Pendan m ap redi travay, ou menm w ap kale wès, kraze brize, met dife. pandan m pwal lekòl, wap rale zam, tire, mete barikad nan lari, tiye moun, pou fè moun pè. Pandan m ap eseye eklere tout moun ki pa gen limyè, ou mete m nan blakawout pou anpeshe moun yo li. Epoutan lè bon jan kout zam pati tout bon, ou kouri, se zèl shemiz ou nou wè, ou mete ba lèzam, ou fè kapon ak papon-nay. Ki jan de moun ou ye vrèman ? Eske w renmen Ayiti ?
Ou pa renmen pale ak moun. Ou pase sou moun, ou pa janm di yo boujou. Men m si yo tap peye w, ou pap shita pou pale ak pèsonn. Kijan w sipoze yon moun dwe konnen sak nan panse w, jistan pou l ta regle yon bagay pou wou ?
Poukisa zago w toujou sou tout sa ki pa pou wou ? Vyolans se sèl mwayen w kapab eksprime w ? Tout kote k gen vyolans, pajanm pwogrese. Ou paka di m ke se sa w vle menm pou Ayiti ak tout Ayisyen ? Mon shè mwen detèmine ke w ou se yon vye demagòg, kigen lontan l ap fè demagoji, ki pa itil ou anyen vrèman. Sèl konsèy mwen ta ba w, kélkeswa laj ou, se pouta retounen al lekòl, pou mete kèk konesans nan mwèl tèt ou.
Pawòl la di ke dan pouri toujou gen fòs sou ban-nann mi. Pa koute yon bann moun ki deja diw ke yon pa sanble avèw, vinn pran tèt ou jis pou tounen panten, jis pouta vinn detwi pwòp peyi w ! Paske divizyon w se viktwa l ye pou jan de moun sayo. Wa konprann, saw konprannn.
Tout sakapfèt yo, se jwèt klas kap domine a lap sèvi. Sa k anba, vle monte anwo ak gwo ponyèt. Sa pa janm fèt nan lemond, san edikasyon. Shanjman w vle a, se a pati edikasyon, pou touse ponyèt ou, mashe kenz ak ven kilomèt apye, ale anba tonèl pou ta kòmanse... Ou tèlman demagòg, ou pasa wè pi lwen ke pwent nenw. Nan prefere ale vit, wap kon-fonn vitès ak presipitasyon.
Vrè shanjman se nan edikasyon wa p sa jwenn li. Detwi, kraze brize, met dife, tire moun, zak kriminèl sayo pajanm fasilite avansman yon pèp. Timal, jete vye zam opresyon sayo, kap fèw tounen yon bèt fewòs, bèt sovaj, pran wout lekòl pito. Paske lè lè a te rive, pouta defann la patrie, se kouri w te kouri, lage zam atè, fè kapon, pran rak.
Pa vinn fè demagoji devan je m la-a ? Pagen zafè !
Weiner Marthone, auteur de Jounal Moun Fou
Aucun commentaire:
Enregistrer un commentaire