1950: Yon powèm sou dwa fanm...

 Se pou fi gen dwa tou

I

An nou wè mezanmi

Se pou nou tout ini

Pou nou gen dwa tou

Sinon n ape toujou

Rete nan vye mizè

Nou p ap janm fè pwogrè.

REFREN

Se pou gen libète

Se pou nou emansipe

Nou bouke rete dèyè

Peyi a dwe fè pwogrè.

II

Fi travay toupatou

Se pou nou gen atou

Pou defann enterè

- E san gade dèyè-

Tout fi ki nan soufrans

Tout moun k ap pase trans.

III

Lè nou tout ap vote

La Chanm reprezante

Lamwatye peyi a

Paske fi yo pa la

Alòske gen plis fi

K ape plede soufri.

IV

An nou tout fè efò

Pou Ayiti pi fò

Douvan tout lòt nasyon

Ki antoure li yo

Nou pa kapab rete

Listwa k ape mache.

V

An ale: Alaso!

Mande Konstitiyan yo

Pou yo mete nan lwa

Fi kou gason gen dwa

Pinga yo betize

Peyi a vle vanse.

VI

Vil Gonayiv de fwa

W ap selèb nan Listwa

Yon lè ou te ba nou

Tout endepandans nou

Fwa sa a nou mande ou

Libète pou fi tou.

26 Septembre 1950

Auteure: Inconnue.

Source: Haiti Sun

Transcription de Weiner Marthone