Copa America: Bresil v Argentine

 

Lè nou gade statistik de ekip yo sanble ke yo gen menm fòs. Men sa k distenge Brezil de Ajantinn se kantite gòl ke Brezil bay lòt ekip yo nan chanpyona-a. Kidonk, Brezil gen yon avantaj bab e moustash sou Ajantinn. Li kapab fasilite bay omwen yon gòl nan match final ki pwal diskite pita vè witè konsa jodi a. Se pou Brezil jwe byen anpil, pa manke opòtinite gòl yo poulsa genyen match sa-a paske Ajantinn pap bal okenn kado. Si Neymar deside jwe ak entèlijans pito, san pakèt teyat, lage kò atè, kouri, tonbe, leve l yo, Brezil kapab chanpyon Copa America 2021 apre kout siflè final match la.

Ajantinn limenm dwe kenbe Brezil anba gwo presyon nan kontwole tenpo jwèt la ak posesyon balon. Si Lionel Messi ak tout ekip la ta kontinye jwe byen konsa san egoyis, Brezil ap nan anpil pwoblèm poul sa genyen match final sa-a. Ajantinn ka menm leve twofe a apre kout siflè final la. Jan statistik la demontre, de ekip yo egal ego, nou ka menm wè sa lan match la kap jwe pita vè zònn witè di swa konsa.

Mise à jour...8:50pm

Premye mitan fèk fini. Ajantinn ap men-nen en a zewo sou Brezil. Gòl de Di Maria nan venndezyèm minit. Yon pike devan sou zèl dwal la ki vinn tonbe nan pye Di Maria, ki kontwole balon an epi lobe gadyen Brezil la. Balon benyen nan filè tou dwat...

Dezyèm mitan.

Nou remake ke abit santral la te gen kontwòl match la. Lite fè yon bon travay kite anpeshe anpil goumen pat fèt sou teren an. Malgre sa nou obsève anpil bosal te fèt, souflèt nan figu, anpil pile pye, pouse, kenbe ak rale mayo. San te menm koule tou wouj nan ba yon jwè ekip Ajanten an.

Nan dezyèm mitan Brezilyen yo louvri yon foutbòl lese frape, gason pa kanpe sou Ajantinn. Deblozay pete! Brezil te rive bay yon gòl awoutsay nan senkannkatriyèm minit, kite anile. On dire ke se pat menm ekip la kite jwe premye mitan-an. Ekip Ajantinn nan te oblije jwe a la defansiv tout rès match la. 

Messi, nan yon kontratak te manke yon gòl toufèt, nan eseye drible gadyen Brezil la. Sete dènye aksyon ofansiv Ajantinn nan match la.

Sis minit pwolongasyon te ajoute. Apre kout siflè final la, se ekip Ajanten an ki te kouwone chanpyon Copa America 2021.