Adrès emosyonèl Michel Martelly...

 

Prezidan, depi m lè m pran nouvèl la, mwen plat atè, m kase, m blese, endiye. M ap poze tèt mwen kesyon. Tout kalite kesyon. Poukont mwen m ap panse. Jodi a m santi m bezwen pale avèw prezidan. M bezwen pale avèw pou m diw mèsi, prezidan. Mèsi pou rèv ou te genyen pou Ayiti. Pou kouraj ou tou. 

Fò n diw mèsi pou bèl egzanp kew trase pou tout yon jenerasyon. Ou demontre anpil jènn fanm ak jènn gason, yon fason pou yo kanpe. Ou ban-nou fòs. Ayiti te bezwen sa. 

Malerezman se nan lanmòw plis moun vinn wè klè. Sa ki tap pale tenten, yo pe. Sa ki pat enterese, yo poze pou yo koute. Lemond choke, la nasyon postène. Sakrifis ke ou fè a. Vi w ke ou bay, kwayans ou pou yon Ayiti miyò, sa pa gen pri.

Prezidan, ou mèt kwè m. Ayiti reveye. Prezidan, nap bon. Jodi a Ayisyen reveye. Umm... prezidan nou pap pèdi batay la. Prezidan cheri, ou te konprann Ayiti. Ou te konprann li ak tout kontradiksyon ki genyen ladan l.

Ou pat pè denonse sa nou tout nou tap di tou ba. Ou pat pè afwonte sa kap detwi nou depi lendepandans. Ou rive nan nan-nan pwoblèm nan. Nèg yo reyaji...yo krazew ak katouch. Men zye pèp la kale. Pèp la an kòlè. Pèp la vekse men pèp la konprann. Pèp la ap mete yo tout sou ban d touch.

Fòk lespwa boujon-nen. Fòk tout moun konte. Nou dwe reòganize epi vanse ansanm, men nan lamen, nou tout ansanm. Se la w tap pwale e nou pap fè bak.

Prezidan, mèsi. Ou meten sou trak. Prezidan, padon. M al chèchew, men-nenw nan jwèt rèd sa-a. N apiyew, nou votew, nou metew la, men se pat pou sa. Nou pat vle madanm ou pèdiw. Nou pat vle pitit ou pèdiw. Nou pat vle pèdiw. Nou pat vle ou pèdi lavi w.

Ekselans, padon. Padon nan non toutsa kitap voye monte chak jou yo, san yo pat konprann ke konpòtman yo tap ankouraje mechan yo pran wout sa-a. Yo pat konprann. Padon. Padon nan non sa ki komèt zak mechan sa-a. Yo pa konprann sa yo fè a. Men yo pap ka etenn solèy la. Yo pap ka kanpe dlo a. Yo pap ka touye tout moun yo. Rèv la ap kontinye fè chimen l. Batay la, batay la pap kanpe. 

Nou menm Ayisyen natif natal, pitit peyi a, nap diw padon. Nap diw padon paske nou konprann. Nou konprann ke Ayiti pèdu. Ayiti a perdu. Ayiti a perdu un fils, un de trop, un génie.

Mais, un lion ne meurt jamais, il dort.

Jovenel, mon frère, repose en paix.

Michel Martelly