Senkantkòb ak Degouden

 Mezanmi, vinn tande yon koze, yon diskisyon ki eklate nan peyi d Ayiti ant Senkantkòb ak Degouden. Senkantkòb di ke li fèk soti nan près, li klere pase nenpòt tèt shòv, okenn men sal poko pase souli. Li woule, fè dis laviwonn, monte desann jan l vle, avan l reyisi tonbe. Tout moun renmen son l bay nan pòsh, yo menm mete l nan mitan wonn nan jwèt mab. 

Tout mèt jwèt tèlman renmen l, yo vòltije l, zatrap li depi anlè, pou moun sa shwazi kiyès ki pwa l piye pou vinn fè kèk tèk bò wonn anvan. Senkantkòb tèlman fè elòj, ap vante tèt li, ke se dekorasyon rad, riban ak meday sèlman lap tann pou yo vinn kouwone l wa d Ayiti. Nan tout okazyon ak sikonstans ki prezante se menm vizaj sa-a li toujou bay moun. Vire, tounen l, se toujou menm penpenp lan.

Mwen menm, kòm bon obsèvatè, mwen shita sou yon shèz pay, anba yon pye zan-mann m ap tande koze...

Degouden limenm byen kolboso anba kout mato ak klou, tèlman ke li parèt ansyen. Se limenm ki pran tout vye kou yo. Yo kraze zo l, matirize l, meprize l, kòm ki dire ke l pagen valè. 

Nan faz li rive a, pagen mwayen pou l ta jwenn yon rajenisman. 

Epoutan sa fè dezan depi l soti nan menm près la, li gen menm valè ak Senkantkòb. Yon dimansh maten, yon sèl foli pran Degouden, li deklare kareman li se Senkantkòb. 

Jou sa-a, Degouden pran wout Frères pou li, kan-nale desann, pase devan simityè, ak tout boulinn, jistan l reyisi ateri nan yon bokit lwil manje ki tap vann sou totwa... A... oukonn tande yo di ke yon moun nan bòl grès li ? Ebyen sete zafè Degouden yo tap pale. Misye tou ajuste l, mete l an-kan konsa l ap tann bokit lwil la souke pou l sa tou shape poul li...  

Nou konnen gen mashann ki pa renmnen prete atansyon. Kouman w vle wè pou yon moun kenbe yon telefòn nan zorèy li tout lasent jounen? Mashann nan sanble li tap pale ak men-naj li, pawòl la tèlman dous sa dwe fèl pèdi lòlòj li jis pye l al frape bokit lwil la. Bokit kite shita sou yon ti tab an-bwa ki patgen asiz deja.

Woy, Degouden tou pwofite soti, li met kò l deyò! Nan woule, woule li vinn tonbe devan anbasad. Li tou pwofite gade tèt li nan yon miwa mesye gad yo tap mete anba mashinn pou enspekte. Sanble l renmen sal wè a. Koulye a misye vinn rive nan Kafou Jòf.

Se nan kafou katpwen kadino sa-a li vinn rankontre ak Senkantkòb kitap flan-nen lamen nan lamen ak de bèl fanm...

Je Degouden vinn tonbe nan je Senkantkòb.

Senkankòb - Marilis, Mita, gad figu yon nèg, ou pata di yon shòv souri ?

Récit tiré de mon livre intitulé: Granmanjè.