Eksplike m tanpri...

Eksplike m shak fwa, 

mwen travay nan shan pwa,

mayi, duri ak pitimi,

se ou menm ki vini,

pran sa, vann jis li fini.

Eksplike m tanpri,

poukisa m pagen duri,

men m pou pitit,

apre tout konbit.

Eksplike m tanpri,

men m apre divizyon,

ak soustraksyon,

yon ti adisyon,

pa janm fèt,

pou tout mèt jwèt

ta retire m anba dèt.

Divizyon 

nan tout televizyon,

ak radyo vonvon.

Panse yon moun,

tankou yon fòs milèt,

ki pa nan jwèt,

men m nan peyi Choukoun,

an Ayiti se pwoblèm gwo zouzoun,

ki renmen pran kontwòl tout moun,

ki gen ti sèvèl wòwòt.

Eksplike m tanpri

pouki divizyon,

ak soustraksyon,

kraze zo miltiplikasyon,

kap finn deperi,

Anba yon ekip abruti.

Tout sa m plante,

se ou k rekòlte,

pwodwi m an divizyon,

ak soustraksyon,

san yon tikras adisyon.

Je ou nan Je m,

wap pase sou mwen,

pa jan m voye men,

pa jan m rele m,

je w sèsh tan w egoyis.

Sak pa konnen w kouri,

al mande w yon ti limyè,

men panse w se pouriti,

lang ou simen plis mizè,

ak lanmò pase gwo maladi.

Eksplike m tanpri,

poukisa tout lespri,

nan prizon,

nan divizyon,

ak soustraksyon,

san yon grenn adisyon.

Auteur: Veritas