Ayiti: Abitud Kraze-Brize...

Kòmansman Mondyal foutbòl 2022 a nan peyi Qatar finn rive sou nou.  Bagay sa-a fè m tris anpil, sa bay lapenn lè m wè ke Ayiti pap reprezante fwa sa-a ankò...

Poukisa, Ayiti toujou gen pwoblèm pou monte yon ekip solid, yon ekip foutbòl tout bon kap jwe tèlman byen ke l ap mashe bat moun?

Fòk yon moun pran san l, refleshi, avan l reponn kesyon sila.

Ayiti gen move abitud kraze. Li ta sanble ke kraze-a koud nan tisu Ayisyen-an menm.

Obsèvasyon ke m te fè sou teren foutbòl fè m kwè shak fwa foutbòl la fè depa an avan, gen yon enbesil ki goumen, pete koken, epi l pran kontwòl òganizasyon-an, fè l retounen, fè bak. 

Kòm ki dire se eksprè menm nèg yo fè pou kraze pwogrè nan kèlke swa domèn Ayisyen-an ta kòmanse ap domine.

Si nou pran epòk, avan e aprè, Mondyal 1974 la te fèt a Munich, nan peyi Almay. Nou tegen bonjan konpetisyon ant ekip premye divizyon an Ayiti. 

Premye divizyon te vinn sèvi kòm yon pepinyè pou devlope bon jwè. 

Se pat bon jwè sèlman kite genyen, tegen anpil bon antrenè tou. Gouvènman Ayisyen-an te konsidere shak jwè foutbòl tankou yon Anbasadè pou peyi-a.

Nan epòk sa-a, shak ekip premye divizyon tegen dwa ajoute twa jwè etranje ladan l. 

Pa egzanp Violette te anboshe twa Ajanten. Victory tè fè menm bagay la. Se sak te kenbe nivo foutbòl la apre n finn patisipe nan Mondyal 1974.

Ayiti tegen anpil bon jwè. Pa egzanp, yon jwè tankou Guy Sainvil, si patgen prejije, te kapab jwe nan nenpòt gwo ekip aletranje. Ernst Jean-Joseph, Arsène Auguste, Mario Léandre, Emmanuel Sanon, Ducoste, Vorbe, Bayonne, Brévil, Francillon, etc. se yon seri de gran jwè ke Ayiti te reyusi devlope lokalman.  

Reyalite-a frape m maten an. Paske, gen anpil peyi kap patisipe nan Mondyal Qatar 2022 a, si nou pat depase yo, yo te nan menm nivo ak nou. Se bagay sa-a ki fòse n fè yon ti refleshi sou zafè move abitud kraze-brize a.

Take the Visitor Survey and receive this FREE gift.

veritas_tum@yahoo.com