Ayiti: Toubiyon an kòmanse...

 Genyen yon enkonpreryansyon

yon sòt de demisyon

kap plane sou yon nasyon.

Genyen yon rayisab

ki pi frèt pase mab

kap anvayi tout yon seksyon.

M te ba w konsèy

Men lè m tap pale 

Ou pat vle koute.

Se jwi ou tap jwi...

Kiyès ou panse, 

Ki responsab?

Pawòl la di

Jou yon revolusyon rive

se pa jou sa l te kòmanse.

Tout pawòl, avètisman 

Powèm, chante, anyen...

E poutan

Tan lontan 

tap rakonte

Lè m a monte

chwal mwen 

gen moun ka kriye.

Dyab manje fanmi

pase men l touye zanmi

pa kite memn trip foumi

tank lopresyon sa-a detwi.

Peyi-a tèt-anba

nan mitan pil fatra

mwen rele ayibobo, aba,

pèp la sèl majistra.

Pèp Ayisyen move,

finn dechen-nen, 

li pase men l pran manchèt

baton fè ak bout bwa.

Si yè lajistis te soud

jodi-a l gade,

e l konstate kantite dega,

zafè lenjistis va rezoud.

Gen sa k tonbe,

ki pat ladan-n.

Yo di se kolateral.

Yon toubiyon bosal 

ki pase pran chwal,

manje sa, lage nan savann.

manman pitit an avan

kouri pran chemen zetwal

anba mach eskalye katedral.

twòp bwi pale fè yonn

pasa tande lòt.

Manman pitit, mare ren,

Pase men,

Pran bib ou al lapriyè

fèmen pòt ak baryè.

Met siy delakwa devan kay.

Sitiyasyon an makab,

inosan ka peye pou koupab.

Erika Zimane pour eMagazine.

Take the Visitor Survey and receive this FREE gift.

veritas_tum@yahoo.com