Nou Nan Fènwa...

 Pil fatra retounen

Zam rale pou maspinen

Gaz ap vann nan ti mamit

Vòlè pa wont lan-nwit

yap mashe gran jounen.

Tout tan sa-a pase

ekonomi kontinye bese

kay kraze sot tonbe

mezanmi gadon w lavi

nap di Abraham sètase.

Mashinn fann lari

Mashann fritay, duri

shita anba pye sabliye

ap manje, manje bliye.

Pousyè finn anvayi

tout zaboka ak bab mayi

tout zèl sapat finn blanshi

moun yo pran lari.

Pagen totwa ankò

pyeton kraze mashinn

sikulasyon se nan rèv

ak televizyon nou wè sa

Pagen wout, se soti Delmas, 

monte Petionville,

vire sou Boudon, desann lavil.

sa pran yon jou antye.

Shita tann trafik mashinn.

Isiba tout moun se shèf

Gen dwa stope mashinn trapde.

vinn pran piyay si w kapab

se pa vini w ki pou sove w.

Talè la-a se kanaval

Ranje kò w pou bwè tafya

pyafe, ranse, manje, koudjay

bwase ren, pase nwit blansh

nan rara laplenn ak leyogann.

Bann apye, bann zobop

bwi fwèt kash, twonpèt

kokenn-shenn desibèl

pòtvwa, tanbou, bat kata

twonbonn, banbou ak bout fè.

Tout bonjan pwojè travay 

baraj, wout ak elektrisite

rete nan tiwa, yo bloke

granmanjè yo pran pouvwa

pa fòs, yap lite

yap goumen sou pakèt kadav

lari sal ak pil fatra.

365 jou pita

yon lane ap pase

espektak la pwal rekòmanse.

La jistis fè yon ti shita.

tout moun ap deja bliye.

Yon bann move Ayisyen

te met ak yon ekip etranje

pou asasinen yon prezidan.

Pwal gen kondisyon 

pita yo pwal mande rekonsilyason

san yo pa fè konfesyon

pou refonde yon lòt nasyon.

Nap fèk kontinye vire an won

si lanmou pa ranplase rayisab

jis tout malfektè, shanpwèl

bizango ta myenyè shanje metye.

Pou yon jou limyè 

ta ranplase fènwa.

Auteur: Weiner Marthone

Texte tiré du livre intitulé : Granmanjè.