Misyon de men vid nan Kwadepre...

Nan gwo moman difisil sa-a, poukisa shak tan nou wè ekip Ayisyen responsab yo toujou kanpe ak de men vid? Entèl, entèl parèt vinn ankonbre yon sitiyasyon ki deja frajil, nan bay moun lanmen san yon grenn prezantasyon valab sou yon plan distribisyon èd pou moun ki viktim yo.

Jan de misyon de men vid ki devan je nou la-a, demontre anpil enkonpetans kap fè anpil malè rive, paske pagen yon plan. Moun ki te gen plan ak vizyon pou byen popilasyon an yon bann move Ayisyen fè touye l. Se yon ekip granmanjè kap dirije koulye a.

Mezanmi, èske w konnen m sezi? Medya Ayisyen anraje... Poukisa se jodi a nou tande ke ansyen senatè k mouri a, te konstwi yon otèl prive? Se jodi a nou tande ke gen yon lòt senatè kigen avyon pal, ke li mete a dispozisyon viktim yo, kap fè vwayaj Cayes-Port-au-Prince. (Nou panse se pa yon sèvis ki gratis non?) Leta Ayisyen pwal peye pita, se lajan pèp la wi, ki pwal peye sa pita. (Gade kijan yon pèp toleran!)

Pi lwen, enfòmasyon tonbe ke shèf lapolis la gen yon oltèl prive nan vil Okap. Se pa detwa sezisman mwen pran. 

Gen anpil lòt dirijan wi, kigen dezoutwa lòt mwayen pou yo kente sou do popilasyon an pandan epi apre yo finn kite pòs yote okipe a. Sa sa vle di? Ebyen, plis blan antre, plis shanm otèl sayo kapab ranpli ak moun. Konferans kap fèt nan otèl sayo, siman yap shaje kòb sa-a sou do leta. Kidonk kawo tranbleman detè vinn kontribye nan plizyè mwayen anrishisman granmanjè sayo mete sou pye pou piye kès leta pirèd. 

Se koulye a mwen reyisi konprann, ke genyen moun ki gen plis enterè nan simen kawo nan peyi d Ayiti. Nèg apfè zye yo byen sèsh pou vinn bay viktim yo lanmen, ak anpil griyen dan. Men bann sadik sayo te deja ranje kabann yo...se sak fè yap parèt, grenn pa grenn, ak de men vid, san yon plan pou rezoud pwoblèm viktim yo epi flay ak tout lajan...se konsa kòb èd yo konn disparèt, nan fè konferans ak lwe shanm otèl ak mashinn...

Jiska prezan moun yo pafè bonjan prezantasyon ni okenn plan ak konferans nan laprès sou sa ki pwal fèt apre tout debleyaj. Èske yap kite moun yo rekonstwi menm kantite ti kay san siman ak bann vye fèy tòl wouye ankò, san bonjan bafè ak  blòk solid? Eske nou pwal kontinye pran woulib ankò jistan yon lòt deblozay pete?

Dan ak grif granmanjè sayo long anpil...se pa vini w ki pou sove w!

Tiré de mon livre intitulé: Granmanjè.